"مواويل وشعر" هذا الاسبوع مكرسة لثلاثة شعراء عراقيين، نتاجاتهم مقرؤة..وأصواتهم عالية، وهم: كامل الركابي، ومشير السعيدي، وحسين الهاجري.
هذه اولا قصيدة (ياعيني على الشام) التي يناجي فيها الشاعر كامل الركابي الشام التي تحولت فيها بساتين التين والتفاح الى محارق ودم وبارود:
ياعيني على الشام
وهوى الشام
ونسيم اول ربيع
ايهب على الشام
ورد شمعه
لمس مخمل
شفيف وداير العام
الله ومن جمال عيونها النجمات
خر وسجد للشام
ياعيني على الفاتنة المسحورة
ابنغم شرقي
وعلى العود الرخيم اتهدّي وتنام
ياعيني على صبح الشموس
ايلامس الفيروز بالطيف
وعلى هدب العروس الناعس اينام
ياعيني على الشام القديمة
ومشية الحلوات
وازهار البنفسج والرياحين
على الريّان والبلور
والنوفره
وكعدات البنات الماخذات العقل
بالتسريح والتوشيح والتكوين
ياعيني على ام الفواكه والبساتين
على الاطراف
اخضر من طبع زيتون
واترف من طبع تين
ياويلي على الشام
تلوّن ياسمين الشام بالدم
وبصوت المغني
انغرز خنجر سام
ياويلاه وأحر قلباه
عالشام!
**** **** ****
أما قصيدة (غربلتك) للشاعر مشير السعيدي، فهي بحق قصيدة مشدودة ومسبوكة بشكل قوي ورائع. وفيها خبرة، وقدرة، وإمكانية شعرية وافرة.
شلقصه اعلى غفله اودست عش وياي
بديه العش بنيته اوبيه سكنتك
مو سنبل عرفتك چنت صم مشبوش
تعبت اسنين اكابر يلا غربلتك
سفيتك مهفه اباب هاي العين
وانت ابهاي عيني اصبحت مرتبتك
خاشرتك ابكلي اوصرت كلي اوياي
سف خوص الحصير ابروحي خاشرتك
لوليتك شباب اوشاب راسي اوياك
دلال ام الضناها اسنين دللتك
مسالتك غريبه اودخت صدگ بيك
وانه امقسم اوضارب رقم مسالتك
مايمشن علي فر اللعب وياي
لعبت اوياك بيهن لمن دوختك
بيع ادنان زرعك على اگصار الراي
كبرت انا اعلى ذني بيوم حيمنتك
ياهافي البخت مبخوت اشور بيك
اوه انه امداني شلون باختك
حسچه او مو غشيم وچنت اعرفك زين
لذلك من طحت مايوم حشمتك
بلچي اتحس گلت ثاريك ماكو احساس
صحت حيهم باذانك يلا حسستك
ماعرگت جبينك واستحت عيناك
صلف تحچي العذولي اگبالي سالفتك
واول ما شفتني اتگول شفت ابليس
حرمل طگطگتلي اوچني فززتك
وتقره امعوذاتك خوف من لاهوت
شكاك وتظن عيناي حاسدتك
ورقه انت وطويتك عن علم واصرار
فرمتها جديد اوياي ذاكرتك
جگاره اوبيك انشع من چنت سكران
لكن من صحيت ابناري ورثتك
**** **** ****
ويبدو الشاعر حسين الهاجري في قصيدة (هموم الراس) مثقلا فعلاً بهذه الهموم، إذ تتضح المعاناة من سواد المفردة، وحزنها الطافح.
اشـﮔد شايل هموم الراس
شـﮔد ناسي بغيابك ناس
ابعروس القاسم اتمناك
ما بين الشمع والياس
تلمع...مثل فص الماس
بيدك ضاعن سنيني
ضاعن تدري حاس اباس
وفوﮔاهه الضمير انداس
وتحلف جذب بالعباس
وتحلف ما الك صوره
عندي وانت طفل انفاس
بيك اثار الي شمات
ﮔبل لا شفتك تنباس
الناس اتشلبتك حيطان
وعلى جتافي بنيت الساس
عفتني...لا نغم لا عود
عفتني لا خمر لا كاس
عفتني فقط...للوسواس
اليوسوس ابصدر الناس
كل لحظه انخبص وانحاس
وانته المثل فص الماس
جميل وماكو بيك احساس
هذه اولا قصيدة (ياعيني على الشام) التي يناجي فيها الشاعر كامل الركابي الشام التي تحولت فيها بساتين التين والتفاح الى محارق ودم وبارود:
ياعيني على الشام
وهوى الشام
ونسيم اول ربيع
ايهب على الشام
ورد شمعه
لمس مخمل
شفيف وداير العام
الله ومن جمال عيونها النجمات
خر وسجد للشام
ياعيني على الفاتنة المسحورة
ابنغم شرقي
وعلى العود الرخيم اتهدّي وتنام
ياعيني على صبح الشموس
ايلامس الفيروز بالطيف
وعلى هدب العروس الناعس اينام
ياعيني على الشام القديمة
ومشية الحلوات
وازهار البنفسج والرياحين
على الريّان والبلور
والنوفره
وكعدات البنات الماخذات العقل
بالتسريح والتوشيح والتكوين
ياعيني على ام الفواكه والبساتين
على الاطراف
اخضر من طبع زيتون
واترف من طبع تين
ياويلي على الشام
تلوّن ياسمين الشام بالدم
وبصوت المغني
انغرز خنجر سام
ياويلاه وأحر قلباه
عالشام!
**** **** ****
أما قصيدة (غربلتك) للشاعر مشير السعيدي، فهي بحق قصيدة مشدودة ومسبوكة بشكل قوي ورائع. وفيها خبرة، وقدرة، وإمكانية شعرية وافرة.
شلقصه اعلى غفله اودست عش وياي
بديه العش بنيته اوبيه سكنتك
مو سنبل عرفتك چنت صم مشبوش
تعبت اسنين اكابر يلا غربلتك
سفيتك مهفه اباب هاي العين
وانت ابهاي عيني اصبحت مرتبتك
خاشرتك ابكلي اوصرت كلي اوياي
سف خوص الحصير ابروحي خاشرتك
لوليتك شباب اوشاب راسي اوياك
دلال ام الضناها اسنين دللتك
مسالتك غريبه اودخت صدگ بيك
وانه امقسم اوضارب رقم مسالتك
مايمشن علي فر اللعب وياي
لعبت اوياك بيهن لمن دوختك
بيع ادنان زرعك على اگصار الراي
كبرت انا اعلى ذني بيوم حيمنتك
ياهافي البخت مبخوت اشور بيك
اوه انه امداني شلون باختك
حسچه او مو غشيم وچنت اعرفك زين
لذلك من طحت مايوم حشمتك
بلچي اتحس گلت ثاريك ماكو احساس
صحت حيهم باذانك يلا حسستك
ماعرگت جبينك واستحت عيناك
صلف تحچي العذولي اگبالي سالفتك
واول ما شفتني اتگول شفت ابليس
حرمل طگطگتلي اوچني فززتك
وتقره امعوذاتك خوف من لاهوت
شكاك وتظن عيناي حاسدتك
ورقه انت وطويتك عن علم واصرار
فرمتها جديد اوياي ذاكرتك
جگاره اوبيك انشع من چنت سكران
لكن من صحيت ابناري ورثتك
**** **** ****
ويبدو الشاعر حسين الهاجري في قصيدة (هموم الراس) مثقلا فعلاً بهذه الهموم، إذ تتضح المعاناة من سواد المفردة، وحزنها الطافح.
اشـﮔد شايل هموم الراس
شـﮔد ناسي بغيابك ناس
ابعروس القاسم اتمناك
ما بين الشمع والياس
تلمع...مثل فص الماس
بيدك ضاعن سنيني
ضاعن تدري حاس اباس
وفوﮔاهه الضمير انداس
وتحلف جذب بالعباس
وتحلف ما الك صوره
عندي وانت طفل انفاس
بيك اثار الي شمات
ﮔبل لا شفتك تنباس
الناس اتشلبتك حيطان
وعلى جتافي بنيت الساس
عفتني...لا نغم لا عود
عفتني لا خمر لا كاس
عفتني فقط...للوسواس
اليوسوس ابصدر الناس
كل لحظه انخبص وانحاس
وانته المثل فص الماس
جميل وماكو بيك احساس
