أولاً: مثلك
مثلك مالگينه وماأظن نلگهعراق وبيك هذي الروح متعلگه
شبگني العشك بمحبتك
وهنياله اليعيش ابروح متشبگه
عراق وياوطن مثلك حمل آلام
وتحدَّه المنايه ومانكر عشگه
تحزم بالامل ماطاح من الضيم
مد طوله اعله جرحه وچلب بعرگه
الاصيل شما تعب حيله يرد اردود
وشلون الكديش يلحگه ويسبگه
اذا انگلبت الدنيا وما بقت گيعان
بس انته التظل يعراقنه وتبقه
ويظل وجهك شمس تغزل ضواهه اشعار
وبنص السما بكل حين متعلگه
ويظل صوتك ضمير لكل الشعب مظلوم
مايگدر عليه الطاغي ويخنگه
احبك واليحب همه وعذابه ايزيد
لو طالت عليه وزادت الفرگه
جرحك بالگلب ما طاب من سنين
واليالي البعد عن دجلته اتغمگه
يابحر الموده گلبي بيك ايفوج
اتوسل ابروجك بلكت ايغرگه
هنياله اليموت بارضك وربحان
لان ارضك حنينه ببكل وفه إتشبگه
*** *** ***
ثانياً:تعال
تعال ازرع صحاري الشك بساتينوتعال ارسم دم عيني ابتسامات
تعال انثر محبه ابدرب السنين
ورجعلي شعبر من عمري وفات
تعال وبالشمس غرگ الروازين
وعلى اخدودي التحبك صير بوسات
تعال امطر محبه وروحي نهرين
ايتلاگن بالفرح والشوگ روجات
ترف سيف الهجر سواني نصين
علي الحگ بقت بالروح ساعات
عراقي آنه ومحبتي من الفراتين
اصلها وللطمع مابيها غايات
ماعيلن واغيظ واحمل الشين
وربتني المصايب خوش تربات
ماانشد حبيبي الرادني وين
ولاأگصر عليه بيوم كلفات
عراقيين احنه وموش من طين
مخلوقين من حب وكرامات
ولان عروگه بگلوب المحبين
يظل واگف نخلنه حتى لو مات
*** *** ***
ثالثاً: ياعراق
إتواخذت الحگ عليهياعراق الموت يمى
وانا وحدي شلون بيه؟
ياعزيز احلام روحي التفن ابچف المنيه
ساعه ويفارگني صوتي
كون اشوفك گبل موتي
چا رجع عمري لشبابه
ورد عمر ثاني إليه
ياعراق
وداعتك ماهمني موتي
انا المعذبني همك
موحرام انموت لكن الحرام
انموت غربه بعيد عنك
لااهل لاربع يمنه
لاگصبنه ولانخلنه
ليش ساكت ياوطنه ماتريد انموت يمك؟؟
يامنيه اتمهلي ابروحي ثواني
انا كل الي اريده تلث اماني
الاولى اشمن شيلة امي وكل اثر منعدها باقي
الثانيه بدرب الحبيبه ازرع ازهار اشتياقي
الثالثه بكل دمعي اسلم عل عراق وكل عراقية وعراقي
وضمن التسجيل الصوتي لهذه الحلقة قصيدة: أجمل محطة للشاعر محمد رحيمة الطائي
