كاظم أسماعيل ﮔاطع: أريــد أبـﭽـي إعله صدرك مشتهي النوح

أريــد أبـﭽـي إعله صدرك مشتهي النوح
و أريـد أﮔـعد إﮔبـالك وأحسب إجروح
ومثل الطير من يودٌع الروح
جاي أرﮔص إبابك رﮔص مذبوح
إهي كسرة عظم ماتجبــَر بيوم
ولا دورة سنه وآثارها تروح
كِسروا واهسي وخلوٌنــي مالوم
وخايف عله عيوني بالبـﭽـي إتروح
كنت آمر وأنهي وصاحب الراي
يوم أييـــدي طويله وجيلتي إتلوح
أريــد أبـﭽـي إعله صدرك مشتهي النوح
وأريد أﮔـعد إﮔبـالك وأحسب إجروح
أريد أركي أعله صدرك راس تعبــان
وأسولف عن عذابي وغربة الروح
جاي أنزع إبـﭽـَفٌك سهم الأصحاب
تبروا من طحت عافوني مطروح
سحـﮔوا فوﮒ راسي وجرهم الخوف
ونزلو للوحَلْ من عالي السطوح
ويوم إلليٌ شفتهم وﮔـعو إبٌيـــر
نزلت وساعدتهم وآنـــه مطروح
ويوم إللٌي شفتهم نزفو إهــواي
ﮔمت إنطيت دم واحلبت الجروح
أريد أبـﭽـي إعله صدرك مشتهي النوح
وأريد أﮔـعد إﮔبـالك واحسب إجروح