في كربلاء الفداء والبطولة والتضحيات، لم يتدفق الدم لوحده، بل تدفق قبله العطر الهاشمي المقدَّس. وإذا كان لون الدم قد أزالته العصور والأزمان، فإن لون البطولة الحسينية باق، وأريج الشهادة الكربلائية خالد الى الأبد. فهذا طالب الدراجي يمَّرعلى أيام الألم الكربلائي بموال زهيري وقصيدة جميلة يقول فيهما:
طالب الدراجي
يالرايح لكربله هـاك الدمــع.. وصله
وديه للي نبع منه الشـــرف.. وصله
لميته وكت البـﭽـي وجمّعته ..ابوصله
ناشف تشوفه لـﭽن هوه يراه.. يجري
ايعرفه ليه الدمع وشنهو العلي.. يجري
يا صاح مالك بطي خلي الجدم.. يجري
لحسين خاف الـﮕلب يصبح الف.. وصله
سلام الله اعلة اولكم وسلام الله اعلة اخركم
وسلام الله اعلة كل ﮔطرة جرت بالـﮔاع من عدكم
حنيناهه جماجمنه فده وهيبه لجماجمكم
وخجل من كل جرح بيكم وحياء ومستحة منكم
نخيط اشفافنة ونسكت اذا نسمع سوالفكم
يعشاﮒ الشهادة...اشلون
نكتب بس شعر عنكم...؟
وشـﮔد الفرق ما بين ...
قصايدنة وقصايدكم؟
الحبر خطط دفاترنا ودم خطط دفاتركم
الشرف والفخر والعلّيه ثوب يلوگ بس الكم
سلام الله على اولكم سلام الله على اخركم ﮔبل كل صبح صبحتوا
وﮔبل كل شمس اشرقتوا وﮔبل كل مزنة زخيتوا وﮔبل كل غيم غيمتوا!
يلماشين درب الموت
ومن الموت ما خفتوا شفتوها الشمس باليل
تضوي ولا عجب ﮔلتواعشـﮔتوهة وتبعتوهة وتالي وي الشمس رحتوا
سبحان الي صوركم
وعلى كل البشر فضلكم
معادنه البشر اشكال
وانتو الذهب معدنكم
سلام الله اعلة كل نظرة
شعت من نواظركم
سلام الله على اولكم
وسلام الله على اخركم
*** *** ***
أخوچ
للشاعر ناظم الحاشي
ناظم الحاشي
اخوچ انه عدل يازينب شتردين
ياهو الـﮕال ميت ونصب فاتحتي
انا الوديت راسي على الرمح ناطور
حشاي تعذرت وعفت ظعن اختي
امانة فاطمه يازينب الحوراء
من ذمة علي وندارت بذمتي
انا العباس اخوهه الماعفته تطيح
وهي نقطة حياء المافارﮔت ﮔصتي
ظيفت السيوف بيوم جاع الدين
وانه الع(*)ته بلحم خاصرتي
اسألو ﭽفوف اديه شكثر ها ياسيوف
من فرسانهم ﭽم سيف يتمتي
انا لعيون زينب ماغفتلي عيون
ولا غبت السيوف الحللت كتلي
البشر صلت بارض لاربعة عشر معصوم
وانه اربعه عشر معصوم صلتلي
عن ياميمنه وياميسره يـﮔولون
حتى اشعر زلم عالـﮔاع ثبتتلي
انه الكورته وقسمته ارباع
وعف ياسيف ملك الموت صاحتلي
جهنم من كثر شيل الجثث للنار
غصيت بجثثهم خبر ودتلي
وانا المدفون واكف ماطحت للـﮔاع
دست طرف الارض والـﮔاع ﮔاملتي
الشمس ردت لبوي وصله بارضه وﮔام
ولو رايد ترد هم ﭽان ردتلي
بعدني ببطن ابوي وزينب الحوراء
شلعت من ﮔلبه وﮔلب حطتلي
كتبت فوك زندي تعيش ياعباس
ومحروس بعلي الكرار كتبتلي
*** *** ***
قصيدة الشاعر رحيم المالكي
الشاعر رحيم المالكي
الى الان تجري يافرات؟
شلون تجري ومايك ازرك يافرات؟
وانته ذنبك مو ذنب يـﮔطر دمه
تسابـﮔت بالطف على حسين السيوف
ومايك اول سهم في صدره انرمه
جان مايك احد من كل السيوف
حيل أثر بالحسين وألمه
بس بنات المصطفى حر الـﭼبود
حسين حر وهاي للحر تلـﭼمه
وعطش عبدالله اللي فرفح بين اديك
ﮔطع ﮔماطة ولعد مايك ومه
طاح ابو السجاد يم جرفك شهيد
بين سيفين العدى وسيف الظمه
انا لو منك اودي ويه الطيور
الماي خاطر منسئل ليش ولمه
لاجن انته تريد تذنب يافرات
وهاي ماتحتاج شرح وترجمه
انفرط عقد الدين وعيونك تشوف
وجان ممكن شربه منك تلظمه
عطشيت الدين عن بكرة ابيه
وﮔطعيت جفوف سبع الموزمه
تدري لو مايك وصل يم الخيام
جا روه العباس منهم صارمه
وجان ما ردت رؤوس على الرماح
ﭼان ردت خيلهم تـﮔطر دمه
شلون طاح حسين يم جرفك شهيد؟
وما ركض مايك لعد جدمة انرمه
طاعت اسماعيل صحراء الحجاز
وانته شح مايك لابن حامي الحمة
ما ظن اسماعيل افضل من حسين
وما اظن امه اتقدم فاطمة
ذاك ابن واحد سأل رب الجليل
كيف تحيي الموته وترد قائمه
وهذا ابن حيدر علي سيف الرسول
المايخاف بدينه لومة لائمه
الـﮔال لو ينكشف عن عيني الغطاء
مايزيد من اليقين الفاهمة
يافرات وبعد تجري يافرات؟
المايشوف الحـﮒ عسه بعينه العمه
كوم طم روحك حدر كبر الحسين
واغتفر لله واطلب مرحمه
ﮔوم واغسل مايك برمل الحسين
وخلي مايك يا نهر يتيممه
الفرق شوفه بينك وبين الكرام
حسين شاف الدين عطشان لدمه
ضحه باخر قطرة من دمه الشريف
وظلت آخر قطرة ثورة وقائمه
حسين اصل الجود وانته اصلك نهر
ويا نهر للنبع انطه وكرمه
حسين صافي واصفى من ماي الجنان
وانته اصلك طين وجروفك طمه
حسين لو منك شرب ﭼان ارتويت
وﭼا تشرف مايك ولامس فمه
لكن انته الحظ عماك وتيهيت
وسوء حظك رادلك هالخاتمة
*** *** ***
سمير صبيح
قصيده الشاعر سمير صبيح
شما اكتب فرد كلمة اعله ورقة يضيع
واكتب يا حسين ويصرخ المطلع
وتاخذني الظنون شراع للأحزان
ويهزني العطش والجود والمصرع
ذبحوك وبقيت شعاع للأحرار
ودفنوك بظلام وجثتك تسطع
من يطلع ﮔمر ﭽن رايتك بالكون
ومن تطلع شمس ﭽن ﮔبتك تطلع
اختارتك طريق اركاب اليحبوك
راووهه الذبح بس ما رضت تخضع
وحتى تعوف حبك حاربتهه سيوف
وهيَّ بغير حبك لا تظن تقنع
وطبرة هامتك وﭽفوف أبو الأمجاد
ناقوس الرفض باذن الظلم يقرع
بس عندي طلب يا ابن داحي الباب
العراق بشاربك يا طيّب المرضع
