ما أن يأتي حديث الشعر الشعبي العراقي، إلاَّ وتجد لشعراء الديوانية حضوراً لافتاً فيه. وما ان تذكر مدينة الديوانية حتى تجد لشعرائها أكثر من ذكرعطر. فالعلاقة بين مدينة الديوانية، وحقل الشعر العراقي، علاقة جدلية وثيقة وقوية جداً.
وعلى ذكر مدن الشعر العراقية، يسرنا أن نذكر أننا قدمنا في حلقات سابقة من "مواويل وشعر" باقة من شعراء الكوت المبدعين، وباقة أخرى من شعراء العمارة الأصلاء، وقبلهما كنا قد قدمنا شعراء بابل، وسوق الشيوخ، وكذلك شعراء الحي المبدعين.
واليوم يسرنا أن نقدم ثلاثة من مبدعي مدينة الديوانية في ثلاث قصائد جديدة، يتقدمهم الشاعر المبدع ضرغام العراقي بقصيدته (متكبرين)، هذه القصيدة الجميلة، التي رسم ضرغام لنا من خلال أبياتها صورة زاهية لسيدة جميلة تعزف على أوتار القلب، وتنشد للحب والحياة، رغم أنف العمر والسنين الفائتة.
وبعد ضرغام العراقي يأتينا الشاعر المبدع حيدر الكعبي بقصيدته الرائعة (أطباع النمل)، ثم الشاعر المبدع بسام السعدي بقصيدة (عراق الحب)، ليشكل الشعراء الثلاثة لوحة فنية زاهية تعبر عن صورة الشعر الشاب في مدينة الديوانية خير تعبير، بعد أن قدمت هذه المدينة من قبل أفضل شعراء العراق، منهم الشعراء الراحلين الكبار:علي الشباني، وصاحب الضويري، وكزار حنتوش، وكاظم خبط، وغيرهم من الشعراء البارزين.
فمرحباً بشعراء الديوانية وهم يغردون في بساتين الإبداع العراقي عبر "مواويل وشعر" ليكونوا إمتداداً نبيلاً لنهر الشعر الديواني.
الشاعر ضرغام العراقي
متكبرين
للشاعر ضرغام العراقي
الى سيدة في الأربعين التقيتها صدفة في شوارع اسطنبول الجمال
يا قبلة ترف يا معبد الحلوين..متكبرين
ياطعم الوفه بملوحة السبعين..متكبرين
يا ثامن عجيبه وانتي ماتدرين!؟
بعيوني البشر كبرانه بالحظات
وانتي شماكبرتي بعمرچ اتزغرين..وهم تحلين
يالكلچ براءه من الجدم للراس
ويالطولچ نيافه وهم غـَـنج تمشين
ولا تنسين..حلوه بالفرح وبحزنچ اتخبلين!؟
واحساسي الدليل وحتى تقتنعين :
من ثغرچ ضَـحك مثل اليصيح افراج
ولو دمعچ نزل چن زمزم وتبچين
وازيدچ للعلم تنويه : صار احراج
وانصحچ هم بعد لسّوگ لطبّين
وي بتچ امس شافوچ كل الناس
گالوا هاي اختهه امهه ممصدگين!
واشكال الحچي واحله الغزل واشعار
وتسوين نفسچ انتي متسمعين
وموبس الزلم داخت يحلوه بيچ
نسوان اليمرن موت مغتاضات
بعيون الحسد من انتي تتعدين
وابو الگهوة بعد حط لافتة عالباب
موگلنة گبل عالگهوة لتمرّين؟! مــاتقرين؟
وصفة حتى الرصيف بجيتچ ولهان
وخصوصاً لو وگفتي فوگة تنتظرين؟
وتأشرين : بساط الريح وينه وفوگة اتصعدين
وياخذني القلق والخوف والصفنات
لحد مابالسلامة البيتچ اترجعين .. وشترجعين
يابيت اليلمچ وانتي كلّچ بيت
لازم سور عدنة وكون سور الصين
وشسّـوين : من الله الجمال البيچ شسّـوين
لامكياج ينفع لاعطر لاثوب
انتي بدونهن ياعمي اتموتين
لتخسرين .. وتعبين .. وتخلين : تنحسدين
وابقي ابيتكم يمعودة لطلعين
بس عندي المهم بعيوني بت عشرين
بس عندي المهم بعيوني متكبرين .. ولتكبرين
فقط يبقة سؤال احتار بيه البال
يحبوچ شكثر بس انتي متحبين؟
**** **** ****
أطبـــاع النمل
للشاعر حيدر الكعبي الديوانية
ما يطيح الحمل من فوگ الچتاف احنه هاى اطباعنه أطباع النمل
ولو تمر بديارك أيام الجفاف اروي گاعك من نواظرنه التهل
اللي ماصدگ گمر بعيونه شاف اني چفي تلوحه وعليها سهل
ماشتلنه الروح يوم اعله الضفاف ومانبالغ بالحچي وضرب المثل
عدنه بس اجناح لكن عله طاف جاب نجمة صبح عيدية طفل
وهذا يا سيف اللي من غمده يخاف شلون ترهم ابيض يصير الكحل
القصيده من يخلخلها الزحاف يضيع كل مضمونهه وسمعك يمل
الحره حره شما رگد ثوب العفاف ومستحيل الگالك مي يشتعل
وگلي يادفتر نكر يوم الغلاف ويا افاعي تخاف لسعات النحل
الرصاصه ما تقبلهه الشفاف والورد مايوم فراشه گتل
ولهذا من الورد صغنه لحاف لليتيم الماغفه وجفنه ذبل
**** **** ****
عراق الحب
للشاعر بسام السعدي
انه احبك يا عراق وحبي ما توسعة الوسعه
انه من كد ما احبك صار حبك ليه صنعه
ولو يصير الكون ضدي صدك بحبك اصرعه
شكثر كالولي نحبك وبعشكهم طلع خدعه
من يمر اسمك عليهم عالخدود ايصير صفعه
ومن يمر اسمك عليه اني كلي انكلب دمعه
اني احبك يا عراق رغم ما بيك المأسي
ولعبت براسي اعوفك ايدي رادت تكص راسي
انه احبك لله والله مو مثل حب السياسي
حبك بكلبي تربع ما كعد فوك الكراسي
كمت احس بحروف اسمك تطلع بطلعت انفاسي
شكد احبك وانته قاسي
انه احبك يا عراق رغم كل البيك بيه
وانه من كد ما احبك انه طحت بين ادية
مو لان اني عراقي لا ولا هاي القضية
بس لا حبك فرض وجبه رب البرية
وانته نور بوجه كل كلمة ظلام
وانته والد للايتام
وانته امام! اي نعم انته امام!
والدليل اعلة الكلام؟
فرقوك؟ وفجروك؟ وهجروك؟ وانته مثل الشجرة واكف شايل اعشوش الحمام!
انة احبك يا عراق بكثر ما عالكاع ذرات التراب
وتدري بيه شوكت اعوفك اعتقد يوم الحساب!
